عصر العلم …د.احمد زويل

بسم الله والحمد لله والصلاه والسلام على رسول الله صلى الله عليه وسلم

الحقيقه حبيت اشاركم فى اخر كتاب قرأته :

عصر العلم 

للعالم المصرى الحاصل على جائزه نوبل فى الكيمياء لعام  1999 

الدكتور احمد زويل

الكتاب من اصدار مكتبه دار الشروق وثمنه 30 جنيه 

انا قرأت الطبعه السابعه من الكتاب مع تقديم للكاتب العالمى نجيب محفوظ  

 

 الحقيقه الموضوع بتاع الكتاب شيق جداا واعتقد ان اى حد من اللى بيحبوا دكتور زويل هيتفق معايا فى الرأى …واعتقد اللى بيحبوه كتير

موضوع الكتاب بيتكلم عن قصه حياه عالم مصرى اصيل مسلم من الدرجه الاولى عاش فى مصر 

حوالى 22 سنه او اكتر قليلا من عمره قبل ما يسافر لبلاد العلم والمعرفه ويكمل نموه هناك 

الكتاب مقسم الى جزئين 

الجزء الاول بيتكلم عن قصه حياه الدكتور زويل بالتفصيل على لسانه هو شخصيا 

وعجبنى جدااا فى الكتاب ان لاقيت كاتب ممتاز وعالم متميز فى نفس الوقت 

ولم اكن اتوقع ان اجد كاتبا يصبح عالم او العكس

بيحكى الكتاب قصه حياه الدكتور زويل من يوم ولادته فى دسوق محافظه البحيره الى ان تخرج فى كليه العلوم جامعه الاسكندريه

بيوصف فيها مشاعره لما كان طالب ومعاناته مع التعليم فى مصر وايضا جوانب قيمه فى هذا التعليم

كمان بيتكلم فيها عن تربيته اللى ادت الى ان يصبح هذا الشخص الذى هو عليه

بيشرح اجتهاده وثقته فى نفسه من يوم كان طالب فى المرحله الابتدائيه وبيشرح ازاى كان محدد هدفه من البدايه لغايه ما حققه

كمان بيتكلم عن مرحله السفر وملابساتها وازاى كان لامضاء شخص ما كل هذا التاثير على حياه عالم كبير دلوقتى 

وانا من وجهه نظرى ارى فى هذا تقييم للواقع المصرى من ضعف تشجيع الشباب المصرى المجتهد فى الوقت الحالى 

واقول ضعف لان هناك ايضا من يقدر كما ان هناك من لا يعبأ بهذا الاجتهاد ولا بقيمته

بيشرح الحياه فى المجتمع المصرى ومقارنته بالواقع الامريكى فى تجربته الشخصيه 

وبيوضح الصعاب اللى واجها من اختلاف الثقافه واختلاف التفكير

يعنى هو بيقول مثلا : 

انه هناك مكنش ينفع تهزر مع حد … مش لان ده ممنوع وانما لانه ببساطه جدااا ممكن يتفهم غلط 

يعنى هو بيقول مثلا انه عندنا ممكن تهزر مع واحد وتقوله ” هقتلك !!!” اما هناك فلما جرب يقولها واحد نظر له نظره غريبه جدااا كانه دكتور زويل بيتكلم جدا

وهو بيحكى بقى انه من بعدها بقى حريص جداا فى كلماته مع الاخرين

كمان بيشرح سر تميز الغرب فى العلوم :

السر ده هو الايمان الكامل والقناعه اليقينيه بأهميه العلم وقيمته فى الحياه وحتى قيمته للامن القومى للبلد

وكمان التقدير للعلماء والدعم المادى والمعنوى ليهم 

واعتقد هو دى البيئه اللى ممكن يحتاجها اى كائن بيعشق العلم علشان يبدع 

من راى دكتور زويل ان مفيش ابداع مع الخوف

وبمناسبه الابداع بقى : دكتور زويل من رايه ان العلم او المعرفه مش مهمه بالقدر الكافى وذلك عند سؤاله عن السر فى انه رغم انتشار الانترنت فى مصر الا انه هذا لم يحدث

نهضه علميه 

وكان التفسير انه العلم فى حد ذاته ليس ذا قيمه عاليه وانما تطبيقه والاستفاده بيه ومحاوله الانتاج الفكرى والعلمى هى المهمه

وده هو الابداع 

يعنى مش مهم يكون عندك الف كتاب ولا المهم انك تكون قريتهم 

المهم انك بعد ما تقرأهم تعرف تطلع حاجه جديده محدش وصلها قبلك وكل ما كانت الحاجه دى 

جديده ومبتكره كل ما زاد التقييم العالمى ليها وكل ما كانت لها مساهمه فى تغيير مسار العلم 

كل ما ده زود فرصت حصوله على جائزه عالميه علميه ارفع ان شالله لغايه نوبل حتى !!!

 

طبعا لا انا ولا دكتور زويل نقصد المعنى الحرفى بتاع جمله ان المعرفه مش مهمه !!!

 

وبالطبع هذا يعنى ان قيمه الحفظ والتلقين انما هى كقيمه الزبد الذى يذهب جفاءا اما ما ينفع الناس فهو الفهم وهو ما يمكث فى الارض  وهذه بالطبع صوره تمثيليه وليست معنى الايه .

نرجع تانى لموضوعنا الاساسى ..

بيحكى كمان د. احمد عن انتقاله من جامعه بنسلفانيا 

وده موقعها لمن يهمه الامر 

http://www.upenn.edu/

بيحكى عن انتقاله من بجامعه بنسلفانيا الى جامعه كالتيك CalTech

او معهد كاليفورنيا للتكنولوجيا 

California Institute of Technology 

وده موقعها برضه لمن يهمه الامر

 www.caltech.edu/ 

والفرق بين الاتنين وشرح شويه المؤسسات التعليميه فى امريكا عامله ازاى ونظام تمويلها بيجى منين وهكذا

وكمان بيقول انه اتقدم لعدد من الجامعات تم قبوله فى معظمها زى جامعه هارفارد وشيكاجو وكلها جامعات عظيمه جداا

بالمناسبه … هو اختار كالتيك بناء على جدول هو عمله وقتها فيه تقييم للفرص اللى قدامه كلها 

ووضع كل العوامل اللى تهمه وادى لكل عامل درجات معينه وبدأ يقارن كل الجامعات بالعوامل

اللى هو حددها وفى النهايه حسب السكور بتاع كل جامعه واتضح فى النهايه ان كالتيك هى اعلى درجه لانها اخدت 92 من 100

يدل هذا على نظام فكرى منظم ومرتب وده اللى ممكن نتعلمه منه 

وبدأ يحكى قصته مع الفمتو وعلوم الفمتو وشرح يعنى ايه فمتو دى ولازمتها ايه وايه المساهمه العلميه 

اللى عملتها الفمتو ثانيه علشان تستحق نوبل 

اعتقد ممكن نتكلم عن الموضوع ده فى نهايه الموضوع  ان شاء الله

ثم بدأ دكتور زويل يتكلم عن حكايه مع نويل وايامه اللى عاشها مع جائزه نويل

 

فى حاجه لاحظتها فى الكتاب :

الدكتور زويل شارح جزء او جانب من حياته الشخصيه العائليه بجزء من التفصيل واعتقد 

ده بيخليها تجربه انسانيه من الدرجه الاولى بكل ما فيها 

يعنى مثلا مكنتش اعرف انه عندى بنتين من زوجه وولدين من زوجه اخرى !

عنده من زوجته المصريه ميرفت …امانى ومها 

ومن زوجته الجزائريه ديما … نبيل وهانى

ربنا يخليهم له ويبارك له فيهم يا رب 

 

وبكده يكون انتهى الجزء الاول  من الكتاب ومن موضوعى

اعتذر عن بعض الخلط بين العربيه الفصحى وبين العاميه …لازم ده شويه وده شويه بس بعتذر للغه ولحضراتكم على هذا 

الحاجه التانيه اللى عايز اقولها ان يمكن اكون قد اخطات فى بعض التفاصيل اثناء كلامى 

ارجو تسامحونى عليها لانى مش معايا الكتاب ….انا خلصته من يومين ومش معايا دلوقتى فانا بحكى من الذاكره

 

الى تكمله الجزء الثانى من الكتاب ومن الموضوع..

تقبلوا تحياتى 

د.احمد