بسم الله الرحمن الرحيم
قرأت مؤخرا كتاب نزلت الطبعه الجديده منه حديثا جداا
اسمه : “لماذا من حولك اغبياء ؟”؟!! اسمه حلو مش كده ؟
الكتاب من تاليف الدكتور الشاب :شريف عرفه …رسام الكاريكاتير فى صحيفه روز اليوسف
والكتاب والمحاضر فى مجال التنميه البشريه
الحقيقه الكتاب عجبنى جداا مش لان الموضوع عجبنى !!! لأ لان اللى الموضوع بيتم التعرض له
من منظور رسام كاريكاتير ساخر وذو قلم لاذع
طيب ايه هو الموضوع اصلا ؟؟
الموضوع بيتكلم عن فنون التواصل مع الناس واللى بتخلى بعض الناس احيانا لما متفهمش بعضها
يستسهلوا ويسلموا بفكره ان من حولهم اغبياء او اقل معرفه وعليه فهم لا يتصرفون كما
ينبغى للعاقل ان يتصرف ( العاقل ده طبعا اللى هو الشخص الاصلى ) …الفكره مش جديده
ولكن طريقه العرض الممتعه والشيقه جداااا بتخليك لازم تخلص الكتاب..
انا خلصت الكتاب قراءه اثناء سفرى للقاهره .. من ساعه لما ركبت لغايه ما نزلت عليما بان الكتاب متوسط الحجم
وبيزيد عن صفحاته عن ال 250 صفحه ..
كمان الكتاب بيتعرض لحاجات مهمه زى البرمجه اللغويه العصبيه مثلا ..
ودورها فى فنون التواصل مع الناس
كمن بيتكلم شويه باختصار عن لغه الجسد او ما يسمى Body language
كما يتعرض لبعض المفاهيم عن القياده وشخصيه القائد
وانماط البشر من حيث سمعى او حسى او بصرى !!
ايضا يتعرض لفن التواصل بين الرجل والمرأه ولماذا لا يفهم منهما الاخر …والحقيقه ان دكتور شريف هنا
اقتبس كثيرا من كلام د.جون جراى John Gray
فى كتابه المتميز ..الرجال من المريخ والنساء من الزهره واللى انصح بقرائته لكل من له تعامل مع الجنس الاخر (ومين منا
مش بيتعامل مع الجنس الاخر ) ؟؟!! رجل او امرأه كنت انت عزيزى القارئ
الكتاب بيتكلم عن بعض المفاهيم الاساسيه اللى لازم تكون فى حياتك ولازم تعتقد فيها ..!!
مش بالاجبار طبعا ..!! انما لما تعتقد فى مثل هذه المفاهيم هتغير لك حياتك كليا ..
وميجيش بقى واحد من اخوانا اللى فاهمين الالتزام غلط يقولى بدعه وتغير حياتك وبتاع ..اقرأه وانت تعرف وبعدين تعالى ناقشنى …!!
زى ايه بقى المفاهيم دى ؟؟
زى مثلا : ان كل انسان له خبرته الخاصه اللى كونها على مدار سنين عمره فبالتالى الاختلاف بين البشر طبيعى
يبقى كل واحد بيتصرف بناء على خبراته الشخصيه
حاول تتصرف من هذا المنطلق ….مش انت بس الصح فى الدنيا وليحترق الاخرون فى نار الضلال يعنى !!!!
كمان بيقولك ان وراء كل سلوك ( سلبى كان او ايجابى ) نيه ايجابيه
يعنى الشخص اللى بيعمل حاجه غلط بيكون بيعملها وهو مقتنع بانها صح وده لان له مفهومه الخاص
واللى هو مختلف عنك تماما …
يبقى ما تتكلمش فى السلوك … ناقش النيه لان هى مدخلك لقلب وعقل الشخص الاخر ..
اللى قلته ده مبدأ من مبادئ علم ال NLP
وغيرها من المبادئ اللى معروضه بشكل لذيذ جداا تسهل على غير المتخصص فهمه واستيعابه
الكتاب من انتاج مكتبه دار الافق وثمنه 20 جنيه مصرى ..
انصح الجميع باقنائه
تحياتى
February 6, 2008 at 11:51 pm
“لماذا من حولك اغبياء ؟”؟!!
اسم بيديللك إحساس ببعض الغرور ، فعلاً حلو ….. …….هههه
أثرت فضولي لقراءة الكتاب ، والسعر كمان يعني نقدر نقول مناسب .. ….
المدونة جديدة ، وبدايتها تبدو قوية ، وخصوصاً في مواضيع الصيدلة ……
هذه زيارتي الأولى ، وإن شاء الله مش هتكون الأخيرة
تقبل تشجيعي
في آمان الله ….. رادار
اقتراح :: لو تغير عنوان الموضوع إلى عنوان الكتاب ، هيكون مشوق أكثر ( مجرد رأي )
February 7, 2008 at 11:35 am
أقتراح قيم فعلا يا سيدى الفاضل …عملت بيه
ويارب متحرمناش من اقتراحاتك القيمه دى ومن زياراتك لمدونتى المتواضعه
تحياتى لحضرتك
February 15, 2008 at 5:52 pm
من اين اشتري الكتاب حيث سالت علييه في اكثر من مكتبة ولم اجده
February 15, 2008 at 8:14 pm
تجده فى مكتبه جرير دار الافق ولهم فروع فى عده اماكن منها :
6 شارع حسين بك من د. محمد حسين هيكل .عباس العقاد ..القاهره
او :
2 شارع السرايات امام كليه هندسه عين شمس العباسيه القاهره
وليهم فرع فى سبينيس اللى فى سيتى ستارز فى مدينه نصر …
تحياتى
March 4, 2008 at 6:03 pm
جميل جدا د/أحمد
وطريقة العرض فعلا مميزة
شوقتني أقرأ الكتاب فعلا وخاصة إن لي إهتمامات شخصية بعلوم التواصل والتنمية البشرية
جزاك الله خيرا
March 5, 2008 at 7:56 pm
اشكرك جزيلا يا دكتوره هبه للتعليق وللزياره ويارب تتكرر وتزورينا هنا باستمرار
May 11, 2008 at 2:59 am
عرض موفق للكتاب يا دكتور أحمد.. تسلم إيدك
May 12, 2008 at 3:55 am
مرورك الكريم اسعدنى كثيرا يا دكتور شريف واتمنى متحرمناش من زياراتك
تقبل تحياتى
March 1, 2009 at 6:09 pm
للحصول على كتاب (لماذا من حولك أغبياء؟):
مكتبة ديوان- فرع الزمالك
Tel.: +(202) 27362598 – 27357631
مكتبة ديوان – مصر الجديدة.
Tel.: +(202) 2690 8184 / 85
*مكتبة ديوان – سيتي سنتر المعادي:
Tel.: +(2012) 600 0169
*مكتبة ديوان- سيتي سنتر الأسكندرية:
Tel.: +(2018) 500 2664
فيرجن – سيتى ستارز
تليفون – 24802240 – 24802244
March 5, 2009 at 12:22 am
السلام عليكم ورحمة الله وبركاته
بارك الله فيك د / أحمد على المدونة والنصيحة باقتناء الكتاب وقراءته
ونتمنى لك التوفيق في تحقيق هدفك ورؤيته حقيقة إن شاء الله تعالى
والسلام عليكم ورحمة الله وبركاته